Psa 104 | SwhKC | STEP | Ee nafsi yangu, umhimidi Bwana . Ee Bwana Mwenyezi Mungu wangu, wewe ni mkuu sana, umejivika utukufu na enzi.

Psalms 104

Kumsifu Muumba

1 ^aEe nafsi yangu, umhimidi Bwana.

Ee Bwana Mwenyezi Mungu wangu, wewe ni mkuu sana,
umejivika utukufu na enzi.

2 ^bAmejifunika katika nuru kama vile kwa vazi,
amezitandaza mbingu kama hema

3 ^cna kuziweka nguzo za orofa yake juu ya maji.
Huyafanya mawingu kuwa gari lake,
na hupanda kwenye mbawa za upepo.

4 ^dHuzifanya pepo kuwa wajumbe ^{▼▼ Au: malaika.} wake,
miali ya moto watumishi wake.

5 ^fAmeiweka dunia kwenye misingi yake,
haiwezi kamwe kuondoshwa.

6 ^gUliifunika kwa kilindi kama kwa vazi,
maji yalisimama juu ya milima.

7 ^hLakini kwa kukemea kwako maji yalikimbia,
kwa sauti ya radi yako yakatoroka,

8 ⁱyakapanda milima, yakateremka mabondeni,
hadi mahali pale ulipoyakusudia.

9 ^jUliyawekea mpaka ambao hayawezi kuuvuka,
kamwe hayataifunika dunia tena.

10 ^kHuzifanya chemchemi zimwage maji mabondeni,
hutiririka kati ya milima.

11 ^lHuwapa maji wanyama wote wa kondeni,
punda-mwitu huzima kiu yao.

12 ^mNdege wa angani hufanya viota kando ya maji,
huimba katikati ya matawi.

13 ⁿHuinyeshea milima kutoka orofa zake,
dunia inatoshelezwa kwa matunda ya kazi yake.

14 ^oHuyafanya majani ya mifugo yaote,
na mimea kwa watu kulima,
wajipatie chakula kutoka ardhini:

15 ^pdivai ya kuufurahisha moyo wa mwanadamu,
mafuta kwa ajili ya kung’arisha uso wake,
na mkate wa kutia mwili nguvu.

16 ^qMiti ya Bwana inanyeshewa vizuri,
mierezi ya Lebanoni aliyoipanda.

17 ^rHumo ndege hufanya viota vyao,
korongo ana nyumba yake kwenye msunobari.

18 ^sMilima mirefu ni makao ya mbuzi-mwitu,
majabali ni kimbilio la pelele.

19 ^tMwezi hugawanya majira,
na jua hutambua wakati wake wa kutua.

20 ^uUnaleta giza, kunakuwa usiku,
wanyama wote wa mwituni huzurura.

21 ^vSimba hunguruma kwa mawindo yao,
na kutafuta chakula chao kutoka kwa Mungu.

22 ^wJua huchomoza, nao huondoka,
hurudi na kulala katika mapango yao.

23 ^xKisha mwanadamu huenda kazini mwake,
katika kazi yake mpaka jioni.

24 ^yEe Bwana, jinsi matendo yako yalivyo mengi!
Kwa hekima ulizifanya zote,
dunia imejaa viumbe vyako.

25 ^zPale kuna bahari, kubwa na yenye nafasi tele,
imejaa viumbe visivyo na idadi,
vitu vyenye uhai vikubwa na vidogo.

26 ^aaHuko meli huenda na kurudi,
pia Lewiathani, ^{▼▼ Lewiathani ni mnyama mkubwa wa baharini mwenye magamba anayefanana na joka kubwa, mwenye umbo la kutisha, asiyeweza kuvuliwa.} uliyemuumba acheze ndani yake.

27 ^acHawa wote wanakutazamia wewe,
uwape chakula chao kwa wakati wake.

28 ^adWakati unapowapa,
wanakikusanya,
unapofumbua mkono wako,
wao wanashibishwa mema.

29 ^aeUnapoficha uso wako,
wanapata hofu,
unapoondoa pumzi yao,
wanakufa na kurudi mavumbini.

30 ^afUnapopeleka Roho wako,
wanaumbwa,
nawe huufanya upya uso wa dunia.

31 ^agUtukufu wa Bwana na udumu milele,
Bwana na azifurahie kazi zake:

32 ^ahyeye aitazamaye dunia, nayo ikatetemeka,
aigusaye milima, nayo ikatoa moshi.

33 ^aiNitamwimbia Bwana maisha yangu yote;
nitaimba sifa kwa Mungu wangu muda wote ninaoishi.

34 ^ajKutafakari kwangu na kumpendeze yeye,
ninapofurahi katika Bwana.

35 ^akLakini wenye dhambi na watoweke katika dunia
na waovu wasiwepo tena.

Ee nafsi yangu, Msifu Bwana. ^{▼▼ Msifuni Bwana kwa Kiebrania ni Hallelu Yah.}

Msifuni Bwana.